*د پوهنې وزارت د ښوونې او روزنې معین د کابل ښار حبیبیې عالي لېسې د زده کوونکو له کلنیو آزموینو څخه لیدنه وکړه*
د پوهنې وزارت د ښوونې او روزنې معین الحاج مولوي سخاء الله سعید، په داسې حال کې چې د دغه وزارت یو شمېر کارپوهانو او د کابل ښار پوهنې مسئولینو یې ملتیا کوله، د حبیبیې لېسې د زده کوونکو له کلنیو آزموینو څخه لیدنه وکړه.
نوموړی یادې لېسې په داخلېدو سره د دغې لېسې د مسئولینو، زده کوونکو او استادانو له خوا د تود هرکلي سره مخامخ شو، له درسي ټولګیو یې لیدنه وکړه او د زده کوونکو کلنۍ آزموینې یې له نږدې وڅارلې.
د پوهنې وزارت معین ښوونکو ته په خطاب کې له هغوی وغوښتل، چې په آزموینو او نورو ارزونو کې د زده کوونکو وړتیا او استعداد ته لومړیتوب ورکړئ او هغوی دې په اسلامي او ملي روحیې سره وروزئ.
نوموړي له زده کوونکو وغوښتل، چې خپل درسونه د آزموينې لپاره نه، بلکې د خپلې علمي پوهې کچې د لوړولو په موخه زده کړئ، تر څو په راتلونکي کې د خپلې ټولنې او هېواد لپاره د ښو خدمتونو سرچينه شئ.
