په بامیان ولایت کې د یو باب ښوونځي لپاره دوه جرېبه ځمکه وقف شوه
د بامیان ولایت ورس ولسوالۍ اړوند د تنور سراب لومړنی ښوونځی چې د ودانۍ چارې یې د دغه ولایت د پوهنې رئیس قاري عنایت الله سهار له خوا پرانیستل شوې وې، ټاکل شوې چې دا ودانۍ د څه باندې یو نیم مېلیون افغانیو په لګښت د ځايي خلکو په مالي مرسته په دوه جرېبه ځمکه کې جوړه شي، کوم چې ارزښت یې ۷۰ زره افغانۍ اټکل شوی او د ضامن علي په نوم د یو تن معارف دوست لخوا وقف شوې ده.
د باميان پوهنې مسئولينو د څرګندونو له مخې: د دغه ښوونځي په جوړولو سره چې شپږ درسي ټولګي او دوه اداري خونې به ولري، د زياتو هغو زده کوونکو لپاره چې لرې پرتو سيمو ته د علم د ترلاسه کولو لپاره تلل د زده کړې ښه زمينه برابره او ورسره به د دوی ستونزې به په بشپړه توګه هوارې شي.
د پوهنې وزارت رهبري د پوهنیز نظام سره د هېواد د خلکو په ځانګړې توګه د بامیان ولایت د پوهنې د مینه والو له مرستو او ملاتړ څخه مننه کوي.
