پوهنې وزارت د ۷م او ۸م بستونو خدماتي کارکوونکو لپاره د سواد زدهکړې کورسونه پرانیستل
د پوهنې وزارت د سواد زدهکړې ریاست لخوا، د مرکزي ریاستونو اړوند د ۷م او ۸م بستونو خدماتي کارکوونکو لپاره، د لیک لوست زدهکړې ښوونیز کورسونه جوړ شول.
په یاده پرانیستغونډه کې د پوهنې وزارت د ښووني او روزنې معین او کفیل الحاج مولوي سخاء الله سعید، د کیفیت تضمین معین الحاج مولوي عبدالخالق صادق، د مقام د دفتر لوی رئیس الحاج مولوي شهاب الدین ثاقب، د سواد زدهکړې رئیس الحاج مولوي عبیدالله آخندزاده، مسئولینو او کارکوونکو ګډون درلود.
په پیل کې د پوهنې وزارت د ښووني او روزنې معین او کفیل مېلمنو او ګډون والو ته د ښه راغلاست ترڅنګ، د علم او پوهې د اهمیت په اړه تفصیلي خبرې وکړې او له ګډون والو یې وغوښتل چې له دغه طلایي فرصت څخه اعظمي ګټه پورته کړي؛ تر څو په راتلونکي کې د خپل ځان او ټولنې لپاره د لا ښه خدمت جوګه شي.
ورپسې د پوهنې وزارت د کیفیت تضمین معین هم د علم او پوهنې د ارزښت، مؤثریت، اړتیا او دوخت اهمیت په تړاو علمي وینا وکړه او د یاد پروګرام ګډون وال یې خپلو اساسي موخو ته متوجې کړل.
د یادو مراسمو پر مهال، د پوهنې مسئولینو له لوري د سواد زدهکړې کورسونو یو شمېر ګډون والو ته په نمونوي ډول ښوونیز توکي او مواد ووېشل شول.
دغه پرتمین مراسم د پوهنې وزارت د کیفیت تضمین د معین الحاج مولوي عبدالخالق صادق په مبارکې دعائیې سره پای ته ورسېدل.
