د بغلان ولایت د پوهنې نوی رئیس معرفي شو
د پوهنې وزارت مالي او اداري معین محترم الحاج مولوي صبغت الله وصیل د هېواد شمالي ولایتونو ته د خپلو رسمي سفرونو په ترڅ کې بغلان ولایت ته ورسېد.
په هغو مراسمو کې چې پکې د بغلان ولایت پوهنې مسئولینو، کارکوونکو، د نورو سیمه ییزو ادارو یو شمېر چارواکو، علماءکرامو او بانفوذه شخصیتونو ګډون درلود؛ د پوهنې وزارت معین له لوري محترم مولوي سید حفیظ الله «معتصم بالله» د یاد ولایت د پوهنې نوي رئیس په توګه معرفي شو.
نوموړي په خپله وینا کې د دغه ولایت د پوهنې د پخواني رئیس محترم الحاج مولوي محمد نور «عزیزي» له فعالیتونو څخه د ستاینې ترڅنګ زیاته کړه: په اداري نظامونو کې تبدیلي او تقرر د چارو لاښه پرمختګ لپاره یو اصل دی او په همدې اساس د جوزجان ولایت د پوهنې پخوانی رئیس محترم مولوي سید حفیظ الله «معتصم بالله» د بغلان ولایت د پوهنې نوي رئیس په توګه وټاکل شو.
دغه راز د پوهنې وزارت معین د بغلان ولایت د پوهنې نوي رئیس ته د راتلونکو دندو په ترسره کولو کې د لا زیاتو بریالیتوبونو دعاء وکړه.
ورپسې د بغلان ولایت د پوهنې نوي رئیس محترم مولوي سید حفیظ الله «معتصم بالله» په خپله وینا کې ګډونوالو ته د ښه راغلاست پر مهال، د پوهنې د رئیس په توګه د ټاکل کیدو په اړه د افغانستان اسلامي.ا.مارت د مشرتابه عالي مقام او د پوهنې وزارت د رهبرۍ له باور څخه د مننې ترڅنګ ډاډ ورکړ چې، د مشرتابه د لارښوونو او احکامو په رڼا کې به خپله دنده په پوره صداقت او اخلاص ترسره کړي.
نوموړي د پوهنې ریاست له آمرینو او کارکوونکو څخه هم وغوښتل چې د ورسپارل شویو دندو په ترسره کولو کې سره بشپړه همغږي ولرئ او په پوره اخلاص او صداقت سره یو له بل سره همکاري وکړئ.
غونډه د مبارکې دعائیې په لوستلو سره پای ته ورسېده.
