فاریاب ولایت کې د یو باب ښوونځي ودانۍ افتتاح او د بل ښوونځي بنسټ ډبره کېښودل شوه
د فاریاب ولایت په خیبر ولسوالۍ کې د سریغتاله لومړني ښوونځي ودانۍ په رسمي ډول د یو لړ مراسمو په ترڅ کې پرانیستل شوه.
په همدې مناسبت د یاد ړولایت پوهنې رئیس محترم الحاج مولوي حمیدالله ارشاد، مسئولینو، د سیمه ییزو ادارو یو شمېر چارواکو، دیني علماءکرامو او د خلکو استازو په ګډون جوړه شوې غونډه کې، پوهنې رئیس د ښوونیزو پلانونو او متوازن پرمختګ په اړه، په ځانګړې توګه په لیرې پرتو کلیو او بانډو کې د تعلیمي مرکزونو د پراختیا او پیاوړتیا او د زدهکوونکو لپاره د خوندي تعلیمي چاپېریال چمتو کولو په تړاو څرګندونې وکړې او له خلکو یې وغوښتل چې د تعلیمي نظام د پروګرامونو پلي کولو بشپړ ملاتړ وکړي.
ورپسې نورو چارواکو، علماءکرامو او د سیمه ییزو خلکو یو شمېر استازو هم د موضوع په هکله خبرې وکړې او د پوهنې وزارت له دغه نېک اقدام څخه یې مننه څرګنده او د تعلیمي پراختیایي پروګرامونو پلي کولو کې یې د خپل ملاتړ ډاډ ورکړ.
د یادونې وړ ده، دغه ښوونځی شپږ درسي ټولګي، یوه اداري خونه، لابراتوار او امنیتي خونه، د لمریزې برېښنا بشپړ سیسټم له ټولو اړینو تعلیمي لوازمو سره لري چې د ۱۳.۱۳ مېلیونه افغانیو په لګښت جوړ او لګښت یې د یوې همکارې ادارې له خوا ورکړل شوی دی.
د یوبل خبر له مخې
د خیبر ولسوالۍ د نوآباد صیاد لومړني ښوونځي د ودانۍ جوړولو بنسټ ډبره هم د پوهنې رئیس او یو شمېر سیمه ییزو چارواکو لخوا د ۲۰۰۰ متره مربع ځمکې په ساحه کې کېښودل شوه، چې د یادې ولسوالۍ د علم دوسته اوسېدونکو لخوا د ښوونځي جوړولو لپاره ورکړل شوې وه.
د یادونې وړ ده چې؛ همدغه پروژه د ۱۳ مېلیونه افغانیو په لګښت د یوې همکارې ادارې په مالي مرسته پلې کېږي.
