د پوهنې وزارت د نتایجو او شهادتنامو ریاست د نوې ودانۍ بنسټ ډبره کېښودل شوه
د پوهنې وزارت د مالي او اداري معین الحاج مولوي صبغت الله وصیل، ځینو مرکزي رئیسانو، د ا.ا.ا. لوړپوړو مېلمنو او علماء کرامو په حضور کې د نتایجو او شهادتنامو ریاست د نوې ودانۍ بنسټ ډبره کېښودل شوه.
په پیل کې د پوهنې وزارت د نتایجو او شهادتنامو رئیس محترم مولوي عبدالقدیم محمد آخندزاده د غونډې برخه والو ته د ښه راغلاست تر څنګ، د موضوع په هکله وینا وکړه او څرګنده یې کړه چې دغه ودانۍ به په ۳ پوړونو کې د شاوخوا ۲۳مېلیونه افغانیو لګښت سره په ۱۸ میاشتو کې جوړه او ګټې اخیستنې ته وسپارل شي.
ورپسې د پوهنې وزارت مالي او اداري معین وویل چې د نوې ودانۍ جوړېدل به د مراجعینو او کارکوونکو لپاره مناسب کاري چاپېریال رامنځته کړي.
نوموړي د پوهنې له ټولو منسوبینو وغوښتل چې خپلې دندې په بشپړ اخلاص ترسره او د ستونزو په حل کې پوره مسئولیت اداء کړي.
همدارنګه د یو شمېر نورو ادارو ویناوالو هم د پوهنې وزارت د رهبرۍ کړنې وستایلې او له دغه وزارت سره یې خپل هراړخیز ملاتړ اعلان کړ.
په پای کې تر دعائیې وروسته د یادې ودانۍ بنسټ ډبره رسماً د پوهنې وزارت د رهبرۍ او لوړ پوړو مېلمنو له لوري کېښودل شوه.
