د پوهنې محترم وزیر د خوست ولایت له مدارسو او ښوونځيو څخه لیدنه وکړه
د پوهنې محترم وزیر الحاج مولوي حبیب الله آغا خوست ولایت ته د رسمي سفر پرمهال له یو شمېر دیني مدارسو او رسمي ښوونځیو څخه لیدنه وکړه او له مسئولینو او زدهکوونکو سره یې له نږدې وکتل.
نوموړي د یادو لیدنو په جریان کې ټینګار وکړ چې د پوهنې د کیفیت لاښه والي لپاره باید د نورو مسایلو ترڅنګ تعلیمي چاپېریال ته هم ځانګړې پاملرنه وشي، ترڅو زدهکوونکي وکولی شي، په مناسبه فضا کې خپلو زدهکړو ته دوام ورکړي.
د پوهنې محترم وزیر په ټولګیو کې له طلابو او زدهکوونکو سره مخامخ خبرې وکړې او هغوی ته یې ډاډ ورکړ چې د پوهنې وزارت به د شته امکاناتو په کارولو سره اړینې اسانتیاوې برابرې او د ماشومانو لپاره به د ښوونې او روزنې بهیر نور هم پسې ښه کړي.
نوموړي زیاته کړه: "زموږ ژمنه دا ده چې په هېواد کې ټولو ماشومانو ته معیاري زدهکړې چمتو او زدهکوونکي ډاډه شي چې د پوهنې وزارت یې بشپړ ملاتړی دی."
همدارنګه د پوهنې محترم وزیر د مدارسو او ښوونځیو له مسئولینو څخه وغوښتل چې په ټاکلي وخت کې تدریسي بهیر پیل کړي، د زدهکوونکو په منظمې حاضرۍ یې ټینګار وکړ او سپارښتنه یې وکړه چې د زدهکړې کیفیت لا ښهوالي لپاره باید نوښتګر او علمي تدریسي مېتودونه وکارول شي.
د یادونې وړ ده چې د پوهنې محترم وزیر په تعلیمي ادارو کې د زدهکړې کیفیت او د زدهکونکو د وضعیت ارزونې او د تعلیمي چاپېریال لاښه والي په موخه بېلابېلو ولایتونو ته سفرونه پیل کړي دي.
