د خوست ولایت د پوهنې نوی رئیس معرفي شو
د یو لړ مراسمو په ترڅ کې محترم شیخ مسلمین راشد د خوست ولایت د پوهنې نوي رئیس په توګه معرفي او خپله دنده یې پیل کړه.
په یادو مراسمو کې د پوهنې ریاست د چارواکو او کارکوونکو سربېره، د ترانسپورټ او هوايي چلند وزارت معین محترم مولوي فیض الله جمال حقاني، د خوست ولایت والي محترم مولوي عبدالله مختار او د سیمهییزو ادارو یو شمېر مسئولینو هم برخه اخیستې وه.
ویناوالو د دغه ولایت د پوهنې نوي رئیس ته د مبارکۍ ورکولو او مېلمنو ته د ښه راغلاست ترڅنګ وویل، چې په دولتي ادارو کې تقرر او بدلون یو اصل دی او له دې سره، د نویو افرادو تجربې او وړتیاوې، د کار په بهیر کې لا پرمختګ او اغېزمنتوب رامنځته کولو لپاره کارول کېږي او د پوهنې د پخواني رئیس له خدماتو څخه هم ستاینه وکړه.
د پوهنې نوي رئیس په خپله وینا کې وویل: (د چارواکو د مشورې پر بنسټ په دغه مقام کې ټاکل شوی او د محترم مشرتابه د باور او اعتماد څخه د ستاینې په ترڅ کې ژمنه وکړه، چې د اړوندو کارکوونکو په همکارۍ به د یاد ولایت خلکو ته غوره تعلیمي خدمتونه وړاندې کړي.)
د مراسمو په پای کې، د خوست ولایت مرستیال والي محترم مولوي محبوبشاه قانت د نوي رئیس د پېژندګلوۍ مکتوب ګډونوالو ته ولوست او مراسم په مبارکې دعائیې سره پای ته ورسېدل.
