د شمالختیز زون علمي او مسلکي غړو وړتیا لوړونې ورکشاپ پیل شو
د علمي غړو د مسلکي او تدریسي وړتیا لوړولو په موخه، د شمالختیز زون (کندز، تخار، بغلان او بدخشان) ولایتونو د مرکزي هستې علمي او مسلکي غړو وړتیا لوړونې ورکشاپ، د پوهنې وزارت د ښوونکو مسلکي پراختیا د رئیس محترم الحاج مولوي محمد ابراهیم عمري له خوا په کندز ولایت کې پرانیستل شو.
د ورکشاپ د پرانیستې په مراسمو کې د کندز پوهنې رئیس او مسئولینو، د یادو ولایتونو د تدریسي برخو چارواکو او د ورکشاپ ګډونوالو برخه اخیستې وه.
په پیل کې د کندز پوهنې مسئولینو مېلمنو او ګډونوالو ته ښه راغلاست ووایه او د ورکشاپ د موخې او اهمیت په اړه یې خبرې وکړې. ورپسې د ښوونکو مسلکي پراختیا محترم رئیس په خپلو څرګندونو کې دغه ورکشاپ ارزښتمن وباله او زیاته یې کړه، چې د یاد پروګرام په تطبیق سره به علمي غړي له اغېزمنو تدریسي لارښودنو، ارزونې مېتودونو، د نصاب د مؤثر تطبیق او د معاصرې ټکنالوژۍ د کارونې له لارې نوې تجربې ترلاسه کړي.
