د پوهنې وزارت د دعوت او ارشاد رياست پلاوي په هرات ولايت کې د ښوونیزو او روزنیزو برنامو د پلي کېدو ارزونه وکړه
د پوهنې وزارت دعوت او ارشاد ریاست د مرستیال مولوي بسمالله حسان په مشرۍ پلاوي هرات ولایت ته د سفر پر مهال، د ياد ولایت له پوهنې مسٸولینو سره په کتنه کې، د دعوت او ارشاد د برنامو د تطبیق څرنګوالی وڅېړه او له یو شمېر امارتي او خصوصي ښوونیزو بنسټونو څخه یې هم لیدنه وکړه.
یاد پلاوي د دعوت او ارشاد د نصاب او پالیسۍ پر اغېزمن تطبیق، د اسلامي او اخلاقي ارزښتونو پر پیاوړتیا او د زدهکوونکو د دیني او روزنیزې کچې پر لوړولو ټینګار وکړ.
همدارنګه، د پوهنې وزارت د منظورۍ له مخې مولوي سیدګلآغا سادات د هرات ولایت د پوهنې ریاست د دعوت او ارشاد د آمر او مولوي عبدالجمیل مستغفر د کارکوونکو چارو د عمومي مدیر په توګه معرفي شول.
سربېره پر دې، د هرات ښار د امارتي او خصوصي ښوونځیو او ښوونیزو مرکزونو له مسئولینو سره په جوړه شوې غونډه کې د دعوت او ارشاد د برنامو د لا ښه تطبیق، د ښوونیزو او روزنیزو چارو د کیفیت پر لوړولو او د وزارت د لوایحو او قوانینو د پلي کېدو په اړه خبرې وشوې.
