د ساینس او ښوونیزې ټکنالوژۍ مرکز د علمي او تخنیکي پلاوي له لوري د یو شمېر ولایتونو له ښوونیزو مرکزونو حمایوي څارنه وشوه
د پوهنې وزارت د ساینس او ښوونیزې ټکنالوژۍ مرکز ریاست د ۱۴۰۵ ښوونیز کال د عملیاتي پلان او خپلو اساسي دندو له مخې، چې اساسي موخه يې په ښوونیزو مرکزونو کې د ساینس او ریاضیاتو د عملي زدهکړو د وضعیت ارزونه، د موجودو امکاناتو څخه د اغېزمنې ګټې اخیستنې لپاره ملاتړ او اړینې لارښوونې وړاندې کول دي، د پنجشېر، غزني، سمنګان، پروان او بامیان ولایتونو له یو شمېر ښوونیزو مرکزونو او د ساینس له مدیریتونو څخه حمایوي څارنه ترسره کړه.
د یاد ریاست د مسوولینو په وینا، دغه څارنیز سفرونه د ۱۴۰۵ ل کال د وږي میاشتې له ۱۱مې نېټې څخه پیل او تر ۱۷مې نېټې پورې یې دوام وکړ.
د سفرونو په ترڅ کې د اړوندو ولایتونو د پوهنې له رئیسانو او د ساینس مرکزونو د مدیریتونو له غړو سره د همغږۍ ناستې ترسره شوې.
همداراز، د ښوونځیو د ساینس او ریاضیاتو لابراتوارونه، کمپیوټر خونې او کتابتونونه له نږدې وکتل شول او د شته امکاناتو وضعیت، د وسایلو د کارونې او ساتنې څرنګوالی، د عملي زدهکړو وضعیت او د ښوونکو له لوري د عملي تدریس څرنګوالی هم وارزول شو.
