د سمنګان له پوهنې ریاست څخه خبرونه
د سمنګانو ولايت د پوهنې رئيس مولوي نصرت الله فيضاني په مشرۍ د دغه رياست اداري غونډه د اړوندو څانګو د آمرینو او مديرانو په ګډون جوړه شوه.
د سمنګان ولایت د پوهنې رئیس د کارکوونکو د کاري راپورونو د اورېدو پرمهال د پوهنې ریاست د نوي ښوونیز کال د دندو، ننګونو او پلانونو په باب خبرې وکړې.
د دره صوف ولسوالۍ په نعمانیه دارالعلوم کې د دغه ولایت د والي، پوهنې رئیس، علماوو او مخورو شخصیتونو په حضور کې ۴ تنو فاضلانو ته د فضیلت لنګوټې ور پر سر شوې.
ویناوالو د ټولنې په جوړښت او پرمختګ کې د دیني علومو پر ارزښت ټینګار وکړ او زیاته یې کړه: زموږ نننۍ ټولنه عالمانو او پوهو خلکو ته اړتیا لري، نو باید ټولنې ته د مسئوولو زده کوونکو د وړاندې کولو هڅې وشي.
د سمنګانو ولایت د پوهنې ریاست له خوا د دغه ولایت د پوهنې په برخه کې د مرستندویو ادارو سره یوه سکتوري غونډه جوړه شوه.
په دې غونډه کې کې ګډونوالو د چاپېریال ساتنې او پراختیایي پروژو، د کښته او پورته دره صوف ولسوالیو کې د ښوونځیو د بیارغاونې، د نویو نیالګیو د ساتنې او پالنې، د حلقوي دیوال د جوړولو، د ښوونکو د روزنې او د سواد زده کړې په برخه کې د بنسټونو په مرستو خبرې وشوې.
د پوهنې وزارت د اسلامي زده کړو معینیت تر څارنې لاندې د سمنګانو ولایت د دارالعلوم او مدارسو اختصاصي ازموینې پیل شوې.
دغه ازموينه د دارالعلومونو د دولسمو ټولګيو له فارغانو څخه په ځانګړي ډول د پوهنې وزارت له خوا د ټاکل شويو معيارونو سره سم د سمنګانو ولايت د پوهنې رياست د اسلامي زده کړو د آمریت د ازموينې د کمېټې تر څارنې لاندې په پوره شفافه فضا کې واخیستل شوه.
د یادونې وړ ده. هغه کسان چې په دغه ازموينه کې معياري نمرې ترلاسه کوي په ١٣٩٢ په نوي ښوونیز کال کې به خپلو زده کړو ته د دوام ورکولو په موخه په دیارلسم ټولګي کې شامل شي.
د سمنګانو ولایت د خرم او سارباغ ولسوالیو د ښوونځیو د لیسو د لیاقت د ازموینو د پیل په باب غونډه د دې ولسوالۍ د ښوونځیو د مدیرانو په ګډون د سمنګان ولایت د خرم او سارباغ ولسوالیو د پوهنې د آمر تر څارنې لاندې جوړه شوه.
د پوهنې آمر په ازموینه کې د شفافیت او عدالت پر څرنګوالي ټینګار وکړ او زیاته یې کړه: د ټولګیو معیار باید د زده کوونکو د لیاقت پر اساس وي، نه د شخصي اړیکو پر اساس.
