د ۱۴۰۳ ښوونیز کال د پیل په مناسبت د افغانستان اسلامي امارت د پوهنې وزارت اعلامیه
بسم الله الرحمن الرحیم
د ۱۴۰۳ ښوونیز کال د پیل په مناسبت د افغانستان اسلامي امارت د پوهنې وزارت
اعلامیه
الحمدلله رب العلمین والصلاة والسلام علی سید المرسلین وعلی آله واصحابه اجمعین.
قال الله تعالی: اقْرَأْ بِاسْمِ رَبِّكَ الَّذِي خَلَقَ (١) خَلَقَ الْإِنْسَانَ مِنْ عَلَقٍ (٢) اقْرَأْ وَرَبُّكَ الْأَكْرَمُ (٣) الَّذِي عَلَّمَ بِالْقَلَمِ (٤) عَلَّمَ الْإِنْسَانَ مَا لَمْ يَعْلَمْ (٥) «العلق ۱-۵»
قال رسول الله «صلی الله علیه وسلم»: طَلَبُ اَلْعِلْمِ فَرِيضَةٌ عَلَى كُلِّ مُسْلِمٍ « ابن ماجه-٢٢٤»
اما بعد:
تر هرڅه نه مخکې د هېواد ټولو قدرمنو علماء کرامو، مدرسینو، ښوونکو، زده کوونکو، طالب العلمانو او د پوهنې وزارت ټولو مسئولینو او منسوبینو ته د اسلام د عظیم پیغمبر او د بشریت د ستر معلم رسول الله(صلی الله علیه وسلم) مسنونه نبوي تحفه وړاندې کوم : اَلسَلامُ عَلَيْكُم وَرَحْمَةُ اَللهِ وَبَرَكاتُهُ
د الله تعالی دربار ته د شکر او عقیدت نذرانې وړاندې کوو، چې یو ځل بیا الحمدلله د اسلامي نظام تر سیوري لاندې د سولې، امنیت او خوښۍ په فضاء کې ۱۴۰۳ ښوونیز کال پیل شو.
الله تعالی ته سوال او دعاء کوو، چې دغه ښوونیز کال دې زموږ د ګران هېواد او قهرمان ملت لپاره د مزیدو خوښیو، سوکالیو او نېکمرغیو پیلامه وګرځي.
له همدې فرصت څخه په استفادې سره غواړم، چې د پوهنې وزارت د مقام له ادرس څخه د هېواد له ټولو علماء کرامو، مدرسینو، ښوونکو ، طالب العلمانو او زده کوونکو سره څو اړینې سپارښتنې شریکې کړم:
د هېواد له ټولو علماءکرامو، مدرسینو او معلمینو څخه په ډېر درنښت هیله کوم، تر څو د هېواد ځوان نسل ته د باکیفیته، عادلانه او متوازنې ښوونې او روزنې په برخه کې د پوهنې وزارت د طرحه شویو پروګرامونو او کړنلارو په رڼا کې پوره زیار وباسي او هڅه وکړي چې د هېواد بچیان په اسلامي عقیده او نبوي اخلاقو سمبال کړي، تر څو متعهد او متخصص کادرونه ټولنې ته د خدمت په موخه تقدیم کړي.
په مرکز او ولایاتو کې د پوهنې وزارت ټولو مسئولینو او منسوبینو ته لارښوونه کېږي، تر څو د هېواد اقتصادي وضعیت ته په پام سره له شته مادي او بشري سرچینو څخه مؤثره ګټه واخلي، د بیت المال په حفاظت او د لګښتونو په کنټرول او سپما کې پوره هڅه او هاند وکړي.
د هېواد په ټولو ګرانو زده کوونکو او طالبانو غږ کوو، تر څو په خپلو درسونو کې پوره هڅه او زیار وکړي، خپل وخت بې ځایه ضایع نه کړي، د خپلو ښوونکو، والدینو او مشرانو احترام او اطاعت وکړي، اسلامي اصولو، ملي ارزښتونو، د هېواد علیاء مصالحو او ملي ګټو ته ژمن واوسي.
د افغانستان اسلامي امارت د پوهنې وزارت ژمن دی، چې د هېواد ګوټ ګوټ او ټولو لیرې پرتو او محرومو سیمو او د راستنېدونکو مهاجرینو بچیانو ته د ښوونې او روزنې متوازن او معیاري خدمات تقدیم کړي.
د تعلیم تعمیم او معیاري کول د پوهنې وزارت د تعلیمي ستراتیژي مهم ټکي دي؛ له دې وروسته به نه یوازې د تعلیم په کمیت بلکې په کیفیت هم پوره تمرکز او ترکیز کېږي.
د پوهنې وزارت په دې هڅه کې دی، چې په راتلونکي ښوونیز کال کې ښوونکو او اداري کارکوونکو ته د وړتیا لوړونې سیمینارونه او ورکشاپونه دایر کړي.
د پوهنې وزارت به په نوي تعلیمي کال کې خپلو امکاناتو او بودیجې ته په پام سره د مدارسو او ښوونځیو د تعمیراتو په ترمیم او زده کوونکو ته د پاکو اوبو، اړینو ضرورتونو او سمسور چاپېریال د برابرولو په برخه کې پوره هڅه او کوښښ کوي.
په ولسي مشرانو، اهل خیر شخصیتونو، ملي سوداګرو، خیریه او نړيوالو بنسټونو غږ کوو، ترڅو د پوهنې له وزارت سره خپلې مادي او معنوي مرستې ونه سپموي او د ښوونیزو خدماتو د کمیت او کیفیت په پياوړتیا کې له یاد وزارت سره خپلې مرستې جاري وساتي.
له ټول ولس په تېره بیا د زده کوونکو له والدینو، علماءکرامو او ملي مشرانو غوښتنه کوو، چې د هېواد دځوان نسل د ښوونې او روزنې د ستر رسالت په اداء کولو کې له پوهنې وزارت سره مرسته وکړي، خپل ماشومان په مدارسو، ښوونځيو او نورو تعلیمي مراکزو کې شامل کړي.
د هېواد له مسلکي او فني کادرونو په تېره بیا د ښوونې او روزنې له متخصصینو څخه هیله کوو، تر څو د ښوونې او روزنې د معیاري کولو په برخه کې خپلې مشورې، تجربې او لارښوونې د پوهنې وزارت له مسئولینو او منسوبینو سره شریکې کړي.
د هېواد ټولو ښوونکو او زده کوونکو ته سپارښتنه کوو، چې خپل صورت او سیرت له اسلامي اصولو سره سم برابر کړي؛ ښوونکي او زده کوونکي دې د داسې لباس له اغوستلو څخه ډډه وکړي چې له اسلامي اصولو او افغاني عنعناتو سره په ټکر او مغایرت کې وي.
په پای کې یو ځل بیا د الله تعالی له دربار څخه د نوي ښوونیز کال لپاره تاسو ته د لازیاتو خوښیو، سوکالیو، نېکمرغیو او بریالیتوبونو دعاء کوم.
والسلام علیکم ورحمة الله وبرکاته
الحاج مولوي حبیب الله آغا
د پوهنې وزارت سرپرست
