د پوهنې وزارت د ودانۍ په انګړ کې د افغانستان اسلامي بانک د ATM ماشین دستګاه فعاله شوه
د پوهنې وزارت او د افغانستان اسلامي بانک د مرکزي دفتر ترمنځ د ځانګړي هوکړه ليک په بنسټ، د بانکي آسانتیاوو د برابرولو په ځانګړي ډول د پوهنې وزارت د کارکوونکو د معاشونو د ورکړې په موخه، د دغه بانک ATM ماشین د ياد وزارت د مرکزي ودانۍ په انګړ کې پرانیستل شو. د يادې دستګاه د پرانيستلو پر مهال د پوهنې وزارت د سرچينو او ادارې معين مولوي صبغت الله وصيل، يو شمېر مسئولينو، کارکوونکو او د افغانستان اسلامي بانک رئيس هم حضور درلود. د پوهنې وزارت معين د ياد وزارت په مرکزي ودانۍ کې د پیسو ترلاسه کولو اتومات ماشین د فعاليت په برخه کې د یاد بانک له دغه نېک اقدام څخه مننه وکړه. له بلې خوا د افغانستان اسلامي بانک رئيس هم د بانکي خدمتونو په برخه کې د آسانتياوو برابرول د ياد بانک له بنسټيزو دندو څخه وبلل او په دې برخه کې يې خپلو هېوادوالو ته د لا زياتو خدمتونو د وړاندې کولو ژمنه وکړه. د اتوماتیک ATM ماشین د پرانیستلو مراسم د پوهنې وزارت د معين او د یاد بانک د رئیس له لوري د پټۍ په پرې کولو او د دعائیې په لوستلو سره پای ته ورسېدل.
