د غزني ولایت پوهنې بنسټونو لپاره ځمکه وقف شوه
د غزني ولایت ګیلان ولسوالۍ اړوند د «اغوجان» کلي څو تنو اوسېدونکو، په یاده ولسوالۍ کې د نورالمدارس مدرسې او ګیلان دارالحفاظ لپاره، خپله ۲ جرېبه ځمکه د یاد ولایت پوهنې ریاست ته وقف کړه.
په هغو مراسمو کې چې په همدې موخه جوړ شوي وو، د غزني پوهنې ریاست مسئولینو، علماوو، او قومي مخورو ګډون درلود.
د پوهنې وزارت مشرتابه د يادې ځمکې دورکړې له امله د غزني ولایت د ګیلان ولسوالۍ د علم دوسته خلکو له نېک احساس څخه مننه وکړه.
د ګيلان ولسوالۍ د پوهنې آمر هم د ښوونیزو بسنټونو د جوړولو د اجر او ثواب په اړه معلومات وړاندې کړل.
ځايي خلکو د پوهنې وزارت له پلانونو د ملاتړ د ټينګار پرمهال، د غزني د پوهنې رياست له مسئولينو وغوښتل، تر څو د يادې مدرسې لپاره د ودانۍ په جوړولو کې همکاري وکړي.
د يادونې وړ ده، چې اوسمهال زده کوونکي په کرايي ودانۍ کې په زده کړو بوخت دي او که ودانۍ ورته ورغول شي، د خوندي ښوونیز چاپېريال د نشتوالي له امله به يې ستونزې هوارې شي.
