په کونړ ولایت کې د سویې د تثبیت په موخه آزموینه واخیستل شوه
د کونړ ولایت پوهنې ریاست د افغانستان.ا.ا. له یو زره ۱۲۰ تنو م.جاهدینو او له پاکستان هېواد څخه راغلو کډوالو څخه د سویې د تثبیت آزموینه واخیسته، تر څو هغوی د خپلو سویو سره سم د زده کړو د دوام په موخه، د ښوونځیو په نهم، لسم او یوولسمو ټولګیو کې شامل شي.
د کونړ ولايت پوهنې ریاست د ښوونې او روزنې آمر، د يادې آزموينې نوماندانو ته ښه راغلاست ووايه؛ د اسلام د سپېڅلي دين له نظره يې د م.جاهدينو د مقام په اړه خبرې وکړې او څرګنده یې کړه، چې د دغه آزموینې ګډون وال په تېرو دوه لسیزو کې د ج.هادي بوختیاوو او کډوالۍ له امله د خپلو زده کړو څخه پاتې شوې وو او اوس د دې وخت رارسېدلی دی، تر څو هغوی خپلې زده کړې بشپړې کړي.
د آزموینې ګډون والو د زده کړو د آسانتیاوو برابرولو په برخه کې د پوهنې وزارت د مشرتابه له هلو ځلو خوښي څرګنده او ټینګار یې وکړ، چې د هیواد په بیارغونه او آبادۍ کې به خپل دیني او ملي رول ولوبوي.
