د کابل ولایت اړوندو ولسوالیو د پوهنې آمرينو ورکشاپ پای ته ورسېد
څه موده وړاندې د پوهنې وزارت د بشري سرچينو او اداري پراختیا لوی ریاست د روزونکو له خوا، د کابل ولایت د څوارلسو ولسوالیو د پوهنې آمرينو ته د وړتيا لوړونې ورکشاپ جوړ شو، چې د یو لړ مراسمو په ترڅ کې پای ته ورسېد.
د ياد ورکشاپ د پای په مراسمو کې د پوهنې وزارت د تشکيلاتو رئيس مفتي عبدالحليم حليمي او د ياد وزارت د ګمارنې رئيس مولوي محمد صادق صديقي هر يو په خپل وار سره خبرې وکړې او د ورکشاپ له ګډون والو يې وغوښتل، چې د ياد ورکشاپ له زده کړو مهارتونو څخه دې په ورځنيو دندو کې اعظمي ګټه پورته کړي.
ورپسې د کابل ولايت پوهنې رئیس هم د کارکوونکو او ښوونکو د وړتياوو لوړولو په اړه خبرې وکړې، د بشري سرچينو او اداري پراختیا لوی ریاست څخه یې د میتودیکي ورکشاپونو او سیمینارونو د جوړولو او د کارکوونکو د مسلکي کولو له امله مننه وکړه.
په پای کې د ورکشاپ ګډون والو ته تصديق پاڼې هم ووېشل شوې.
د یادولو وړ ده، چې یاد ورکشاپ ۷ ورځې دوام درلود.
