د پوهنې وزارت د سرپرست له خوا یو تن زده کوونکی وستایل شو
روح الله د اېمل خان زوی چې د میدان وردګ ولایت سیدآباد ولسوالۍ اړوند د کفتان تاج محمد خان لېسې د درېیم ټولګي زده کوونکی دی، د خپل ښوونځي او ټولګي سره د علاقې له امله یې هغه پیسې چې پلار یې د بوټونو اخیستلو لپاره ورکړې وې، د ښوونځي د ترمیم لپاره وقف کړې.
د ياد ماشوم دغه علم پروره احساس نه يوازې د ياد ولايت د پوهنې رياست د رهبرۍ پام ځان ته واړاوه، بلکې د پوهنې وزارت د مشرتابه د پاملرنې او شفقت موضوع هم وګرځېده.
د پوهنې وزارت سرپرست الحاج مولوي حبیب الله آغا یاد زده کوونکی د خپل پلار او د سیدآباد ولسوالۍ د پوهنې آمر الحاج همایون نېکمل سره یو ځای وستایه او هغو ته یې ستاینلیک او نقدې پیسې د ډالۍ په توګه ورکړې.
د پوهنې وزارت سرپرست یاد زده کوونکي ته د ښه راغلاست پرمهال وویل: د افغانستان راتلونکی په تاسو پورې اړه لري او تاسو د دې هېواد د راتلونکي معماران یاست.
نوموړي د زده کوونکي له والدینو هم مننه وکړه، چې د خپل ماشوم سالمه روزنه او پالنه یې کړې ده.
ورپسې د سید آباد ولسوالۍ پوهنې آمر د پوهنې وزارت د رهبرۍ له پاملرنې او خواخوږۍ څخه د زړه له کومې مننه او قدرداني وکړه او زياته يې کړه: وياړم چې د پوهنې په وزارت کې دنده ترسره کوم او د هېواد بچیانو سالمې ښوونې او روزنې لپاره هلې ځلې کوم.
نوموړي وویل، دا د ویاړ ځای دی، چې د پوهنې وزارت رهبري د هېواد بچیانو سالمې ښوونې او روزنې ته جدي پاملرنه کوي او د یاد زده کوونکي په تړاو د پوهنې وزارت د سرپرست د شفقت او هڅونې څخه د زړه له تله مننه کوم.
