په بامیان ولایت کې د درې بابه ښوونځیو د ودانیو رغنیزې چارې پای ته ورسېدې
د بامیان ولایت په یکاولنګ او سیغان ولسوالیو کې د درې بابه ښوونځیو د ودانیو رغولو چارې، د شاوخوا ۷۵ مېلیونه افغانیو په لګښت بشپړې او ډېر ژر به په رسمي ډول ګټې اخیستنې ته وسپارل شي.
په یادو پروژو کې د داګاه، بیاني او پسرویه غارک ښوونځيو ودانۍ شاملې دي، کوم چې د یو خیریه بنسټ په مالي ملاتړ جوړې شوې دي.
د ښوونځيو دغه ودانۍ، درسي ټولګي، اداري خونې، لمریزې برېښنا سیسټمونه، شنې ساحې او نور اړین لوازم لري، چې په پایله کې به یې زده کونکو لپاره یو مناسب تعلیمي چاپېریال برابر شي.
د بامیان ولایت د پوهنې ریاست چارواکي وايي، چې د پوهنې وزارت لخوا، د زده کړې د کیفیت او کمیت لاښه والي لپاره هراړخیزې هلې ځلې روانې دي او دوی هڅه کوي چې د هېواد ټول ماشومان له معیاري ښوونیزو او روزنیزو چوپړونو څخه برخمن کړي.
