د پوهنې وزارت له خوا ۹۳۹۸ قلمه استهلاک شوي توکي لیلام شول
نن د پوهنې وزارت د خدماتو رئیس او مسئولینو په حضور کې، د یاد وزارت استهلاک شوي ۹۳۹۸ قلمه بېلابېل توکي د آزاد رقابت پروسې له لارې لیلام ته وړاندې شول.
په هغو مراسمو کې چې په همدې مناسبت جوړ شوي وو، د پوهنې وزارت د خدماتو رئیس استاد حبیب الله "خالد" وویل: په دغو استهلاک شویو توکو کې کمپیوټرونه، مېزونه، څوکۍ، ماشینونه او نور بېلابېل اجناس شامل دي، کوم چې په بشپړ ډول له کاره لوېدلي وو او نن د ۱۵۰ داوطلبانو تر منځ د آزادې سیالۍ له لارې لیلام ته وړاندې او د پلور تړون به یې له ګټونکي شرکت سره لاسلیک شي.
نوموړي زیاته کړه، د ټولو لیلام شویو توکو شمېر تر ۹۳۹۸ قلمه پورې رسېږي او ټولیزه بیه یې ۴ مېلیونه ۵۳۰ زره افغانۍ ده، چې د پلور پیسې به یې د افغانستان اسلامي ا/مارت خزانې ته حواله شي.
د یادونې وړ ده، چې دغه غیر فعال توکي له تېرو څو کلونو راهیسې د پوهنې وزارت په ګدامونو کې پراته وو او نن د یاد وزارت خدماتو ریاست د ځانګړي پلان پر بنسټ وپلورل شول.
