د پوهنې وزارت د تشکیلاتو رئیس تخار ولایت ته سفر وکړ
د پوهنې وزارت د تشکیلاتو رئیس محترم مفتي عبدالحلیم حلیمي، چې د یو کاري سفر په ترڅ کې تخار ولایت ته تللی، د یاد ولایت له پوهنې رئیس محترم مولوي محمد اسماعیل ابو احمد سره وکتل او خبرې یې ورسره وکړې.
د پوهنې وزارت د تشکیلاتو محترم رئیس د خپل سفر موخه د ښوونځیو او مدارسو د تشکیلاتو متوازن کول وبلل او ویې ویل چې د پوهنې وزارت تشکیل باید د هېواد په ټولو ولایتونو کې په متوازن ډول پلی شي.
نوموړي زیاته کړه، د دې لپاره چې د تشکیل له تورم څخه مخنیوی وشي، د استادانو او ښوونکو بستونه باید د ښوونځیو او دیني مدارسو له اړتیاوو سره سم برابر شي.
په همدې حال کې د تخار ولایت پوهنې رئیس، د ورغلي مېلمنو هرکلی وکړ او د یاد ولایت د پوهنې اوسني وضعیت او تشکیل په اړه یې معلومات وړاندې کړل او د تشکیل د متوازن کولو په برخه کې یې د پوهنې وزارت له نوښت څخه مننه څرګنده کړه.
