په بامیان ولایت کې د ښوونکو لپاره د وړتيا لوړونې روزنیزه برنامه پیل شوه
د بامیان ولایت په پنجاب او یکاولنګ ولسوالیو کې د «اغېزمنې ښوونې او زدهکړې ترویج» تر سرلیک لاندې شپږ ورځنی روزنیز پروګرام د ۹۳ تنو ښوونکو لپاره په جلا او هممهاله توګه پیل شو.
په ياد پروګرام کې د پنجاب ولسوالۍ ۴۳ او د یکاولنګ ولسوالۍ ۵۰ تنه ښوونکي ګډون لري.
دغه روزنیز پروګرام د یوه خیریه بنسټ په مالي او تخنیکي ملاتړ د ښوونکو د مسلکي ودې، وړتيا لوړونې او د ټولګیو د تدریسي اصولو پیاوړتیا په موخه جوړ شوی دی.
ټاکل شوې ده چې ګډونوال ښوونکي له اخلاقي او مسلکي اصولو، د زدهکړې د موخو له ټاکلو، د تدریس له نويو میتودونو او تخنیکونو، د لوست بنسټیزو توکو او د حساب د اساسي پړاوونو په ګډون له مهمو او بنسټيزو موضوعاتو سره اشنا شي.
