په بامیان ولایت کې د پوهنې آمرینو او د مسلکي پراختيا مدیرانو لپاره د مسلکي وړتیا لوړولو برنامه جوړه شوه
د پوهنې وزارت له لوري د بامیان او دایکندي ولایتونو د پوهنې آمرینو او د ښوونکو مسلکي پراختيا عمومي مدیرانو لپاره د مسلکي وړتیا لوړولو یو ورځنۍ برنامه جوړه شوه.
په دغه برنامه کې چې د ښوونځیو په چارو کې د ټولنې د ونډې اخیستنې، د ګډونوالو د دندو او مسوولیتونو د لا ښې پېژندنې او د عمومي مدیرانو د کاري لایحو د تشریح په موخه
«په ښوونځیو کې د ټولنې ونډه اخیستنه» تر سرلیک لاندې جوړه شوې وه، د پوهنې وزارت د ښوونيز نصاب او د ښوونکو مسلکي پراختيا لوى رئیس محترم الحاج مولوي اولګل ایوبي او د یادو ولایتونو د پوهنې مسوولینو پکې ګډون درلود.
د پوهنې وزارت د ښوونيز نصاب او د ښوونکو مسلکي پراختيا لوى رئیس په خپلو خبرو کې د ملک د پرمختګ او په ټولنه کې د سواد د پراختیا په برخه کې د مدیرانو او ښوونکو پر مهمو او درنو مسوولیتونو خبرې وکړې. نوموړي ښوونکي د ټولنې د ودې او روښانه راتلونکي له اساسي عواملو څخه وبلل او د ښوونکو د مسلکي وړتیاوو لوړولو او د ښوونې او روزنې د کیفیت په ښهوالي کې یې د مدیرانو پر مهم رول ټینګار وکړ.
