د جوزجان ولایت شکرک منځني ښوونځي اړوند ۲ جرېبه ځمکه بېرته پوهنې ته ولېږدول شوه
د جوزجان ولایت پوهنې رئیس محترم الحاج مولوي لعل جان راشد وايي: د شکرک منځني ښوونځي د ۲ جرېبه ځمکې په اړه لس کلنه لانجه د ځمکو د غصب مخنیوي کمېسیون په همکارۍ پای ته ورسېدله او یاده ځمکه پوهنې ریاست ته ولېږدول شوه.
نوموړي وویل: "دغه ځمکه پخوا د یو تن سیمهییز اوسېدونکي لخوا د ښوونځي جوړولو لپاره پوهنې ریاست ته ورکړل شوې وه، چې د یاد اوسېدونکي له مړینې وروسته د هغه وارثان له دغې موضوع څخه خبر نه درلود او اوسمهال د اسنادو په وړاندې کولو سره، یاده ځمکه د پوهنې ریاست ملکیت په توګه بیا ځلې ثبت شوه."
د جوزجان ولایت پوهنې رئیس د مرحوم له کورنۍ څخه د مننې په څرګندولو سره وویل: "دغه اقدام د پوهنې لپاره د خلکو ژمنتیا او د تعلیمي ادارو سره همکاري ښیي او موږ له ټولو کورنیو او خیریه خلکو څخه غواړو چې د پوهنې په ملاتړ کې فعاله ونډه واخلي."
