د ولایتونو له پوهنې ریاستونو څو لنډ خبرونه
کابل
د کابل ولایت پوهنې ریاست تخنیکي ټیم په خاکجبار او فرزه ولسوالیو کې د پوهنې له ځینو ترمیماتي او رغنیزو پروژو د چارو له جریان څخه لیدنه وکړه.
هغوی د ودانیزو مسئولینو سره په خبرو کې د کار کیفیت او د لوړ کیفیت لرونکو ودانیزو موادو د استعمال پر اهمیت ټینګار وکړ.
په یوه بل خبر کې ویل شوي، چې د کابل ولایت د ۶ ولسوالیو محلي تعلیمي شوراګانو لپاره د ۵۴۹ تنو کسانو په ګډون سره د یوې مرستندویه ادارې له خوا د مسلکي او مهارتي وړتیاوو لوړولو ورکشاپ ترسره شو.
په پای کې د ورکشاپ ګډونوالو ته یو مقدار قرطاسیه توکي هم ووېشل شول.
ننګرهار
د پوهنې وزارت د کیفیت تضمین معینیت یوه پلاوي ننګرهار ولایت ته سفر وکړ.
پلاوي د ننګرهار له پوهنې رئیس محترم شیخ محمد شریف حلیمي او نورو مسئولینو سره وکتل او د تعلیمي وضعیت ښه کولو او د سفر اجنډا کې شاملو نورو موضوعاتو په اړه یې بحث ترسره کړ.
