د پکتيکا ولايت په يوه لیرې پرته سیمه کې یو باب ديني مدرسه پرانیستل شوه
د پکتیکا ولایت شیخیل آباد ولسوالۍ سلیمان خېلو په کلي کې د «شمس المدارس صدیقیه» دیني مدرسه پرانیستل شوه.
یاده مدرسه د سيمې د خلکو په مرسته څلور جرېبه ځمکه کې د سل زره افغانيو په لګښت جوړه او ګټې اخيستنې ته وسپارل شوه.
د دغه ديني مدرسې د پرانيستې په مراسمو کې د پوهنې پر ځايي مسئولینو سربېره يو شمېر علماوو، مشرانو او د پوهنې مينه والو هم برخه اخيستې وه.
د يادې ولسوالۍ پوهنې آمر مېلمنو ته د ښه راغلاست ترڅنګ، د هېواد له پوهنې بهير څخه د ملاتړ له امله د يادې سيمې له خلکو څخه د مننې په ترڅ کې، د علومو د زده کړې په فضيلت خبرې وکړې او خلکو ته يې ډاډ ورکړ، چې د ښوونیزو خدمتونو د پراختيا په برخه کې به خپلو همکاريو ته دوام ورکړي.
ورپسې څو تنو ګډون والو هم د موضوع په اړه خبرې وکړې، د پوهنې وزارت او د پکتیکا ولایت پوهنې ریاست له پروګرامونو او پلانونو یې خپل مادي او معنوي ملاتړ اعلان کړ.
یاد مراسم په دعائیې سره پای ته ورسېدل.
