د ځينو ولایتونو پوهنې خبرونو ته لنډه کتنه

خوست

د خوست ولایت د پوهنې نوی رئیس مولوي فیض الله جمال، د یاد ولایت د مقام د مرستیال مولوي محبوب شاه قانت له لوري د پوهنې ریاست مسئولینو ته ور وپېژندل شو.

د خوست ولايت د پوهنې رئیس مولوي فيض الله جمال د.ا.ا. او پوهنې وزارت د مشرتابه له اعتماد څخه د مننې ترڅنګ ژمنه وکړه، چې د هېواد د ښوونې او روزنې په برخه کې به له هېڅ راز هڅو څخه درېغ ونه کړي.

نیمروز

د نیمروز ولایت پوهنې ریاست د یو لړ بدلونونو په ترڅ کې، د یاد ولایت د پوهنې ریاست یو شمېر اداري کارکوونکي او د ښوونیزې څارنې پخواني غړي د پوهنې ریاست د علمي او مسلکي غړو په توګه وټاکل.

یاد کسان د یو لړ مراسمو په ترڅ کې د پوهنې رئیس له لوري خپلو همکارانو ته وروپېژندل شول.

جوزجان

د جوزجان ولایت پوهنې رئیس الحاج مولوي محمد طاهر جواد وايي، دوی توانېدلي چې د پوهنې وزارت په همکارۍ د یاد ریاست د مرکزي هستې ۶۰ تنو کارکوونکو ته د هغوی د وړتیاوو لوړونې په موخه، ښوونیز پروګرام پیل کړي.

د نوموړي په وينا، یاد پروګرام په پنځو څانګو (اداره او مديريت، پلان جوړونې، چلند، ارزونې، تطبيق او راپور ورکولو) برخو کې د څلورو ورځو لپاره په لاره اچول شوى دى.

پکتیکا

د پکتيکا ولايت د پوهنې رياست مسئولین وایي: د یاد رياست د کيفيت تضمين آمر او څلور نور نوي غړي په دندو وګمارل شول او نن د دغه ولايت د پوهنې رئیس الحاج مولوي عبدالقيوم فاروقي له لوري خپلو همکارانو ته ور وپېژندل شول.