هرات ولایت کې د دریو ښوونځیو نوې ودانۍ پرانیستل شوې
پوهنې وزارت، هرات: د هرات ولایت کرخ ولسوالۍ کې د پایان بلوک لیسې، د شیخ الاسلام او پاشدان لومړنیو ښوونځیو ودانۍ د یاد ولایت والي عبدالوحید قتالي، د پوهنې رئیس ذکریا رحیمي، د ولایتي شورا او دولتي ادارو ګڼ شمیر چارواکو لخوا پرانیستل شوې.
د پایان بلوک لیسې ودانۍ په پاخه او اساسي ډول د ۸۰۰ متر مربع په زیر بنا سره د ۷ میلیونو افغانیو په لګښت د سیمې د خلکو په مالي مرسته جوړه شوې ، چې ۲۰ ټولګي او نورې اړینې آسانتیاوې لري، همدارنګه د شیخ الاسلام او پاشدان لومړنیو ښوونځیو ودانۍ د ۱۵۰۸ متر مربع په زیر بنا سره د کلیو بیارغونې او پراخیتا وزارت د اقرأ پروژې لخوا جوړې شوي، چې د شیخ الاسلام کرخي ښوونځي ودانۍ ۹ ټولګي او د پاشدان ښوونځي ودانۍ ۶ ټولګي او نورې ښوونیزې آسانتیاوې لري، د یادو ودانیو په جوړیدو سره د سیمې ماشومانو ته خوندي ښوونیز چاپیریال برابر شو.
د هرات د پوهنې رئیس ذکریا رحیمي وویل: د دې ودانیو په جوړیدو له زړه خوښ یم ځکه د سیمې ګلالیو ماشومانو ته د زده کړو خوندي چاپیریال برابر شو، د دې ترڅنګ د ۱۳۹۹ کال په لړ کې ۱۰۰ ښوونځیو ته نوې ودانۍ جوړې شوې.
همداراز کرخ ولسوالۍ کې د ۱۱ نویو ښوونځیو په جوړیدو سره، نوموړي ۱۴۰۰ تعلیمي کال ولسوالیو ته د پاملرنې کال وباله، او زیاته یې کړه: سږ کال به د پوهنې برخه کې د انډول برابرول لپاره هلې ځلې کوو او د پوهنې وزارت ستراتیژیکي موخې به پلې کوو.
