د پوهنې وزیر ډاکتر بلخي او د کندهار والي حیات الله حیات ترمینځ په لیدنه کې د کندهار ولایت د ښوونې او روزنې وروستنۍ حالت وڅيړل شو
پوهنې وزارت- کابل: پوهنې وزیر ډاکتر محمدمیرویس بلخي د کندهار ولایت له والي حیات الله حیات سره په یاد ولایت کې د ښوونیزو خدمتونو ښه والي په موخه لیدنه او خبرې اترې وکړې.
دا لیدنه چې د پوهنې وزارت په کوربه توب تر سره شوه؛ دواړو لورو د کندهار ښوونې او روزنې حالت ، شته ستونزو په ځانګړي ډول په یاد ولایت کې د نويو اقداماتو نه وروسته د ښوونیزو خدمتونو حالت په اړه خبرې اترې وکړې.
ډاکتر بلخي په دې لیدنه کې د ښوونیزو خدمتونو ښه والي او پراختیا په موخه د پوهنې وزارت او د کندهار ولایتي چارواکو د همکاريو پياوړتیا غوښتونکۍ شو او ټولو ولایتونو ته د پوهنې پروګرامونو او وسایلو، ښوونیزو خدمتونو ته د یوشان لاسرسي لپاره د پوهنې وزارت مشرتابه له پاملرنې څخه یادونه وکړه او د کندهار ولایت ښوونې او روزنې پراختیا لپاره یې هڅې لکه نورو ولایتونو ته یوه اړتیا یاده کړه.
د کندهار والي حیات الله حیات همدارنګه په ولایتونو کې د پوهنې وزارت مشرتابه له ښو کړنو څخه د ستاینې ترڅنګ، د پوهنې وزارت سره د لازیاتو همکاریو ژمنه ورکړه.
د کندهار والي د ښوونې او روزنې ښه والي لپاره د سکتوري برخو ډیري همغږۍ او یووالي رامینځ ته کولو په موخه د ولایت په مقام کې د ښوونې او ورزنې په نامه د یوې ورځې د ځانګړې کولو څخه خبر ورکړ.
کندهار والي حیات الله حیات په غونډه کې د ياد ولایت شته شتونزې لکه د کندهار پوهنې ریاست کې د تشکیل، د ښوونکو او د درسي کتابونو ستونزې یې د پوهنې وزارت له مشرتابه سره شریکې کړې.
