د کابل ولایت او د ښار پوهنې ریاستونو تشکیلاتي جوړښت وارزول شو
د پوهنې وزارت د سرچینو او ادارې د معین مولوي صبغت الله وصیل په مشرۍ غونډه، د کابل ولایت او د ښار پوهنې ریاستونو په خالي بستونو کې د نویو ښوونکو د ګمارنې او د تشکيلاتي اړتیاوو د ارزونې په موخه جوړه شوه.
په یاده غونډه کې د پوهنې وزارت د سرچینو او ادارې معین، د بشري سرچینو او اداري پراختیا لوی رئیس مفتي محمد یوسف ثاقب، د کابل ولایت او د ښار پوهنې ریاستونو مسئولینو ګډون درلود.
د غونډې په پیل کې د کابل ولایت او د ښار پوهنې ریاستونو تشکيلات وارزول شول او په دغه برخه کې مسئولې کمېټې ته دنده وسپارل شوه، تر څو د یادو ریاستونو تشکيلاتي اړتیاوې وارزوي او د خالي بستونو توحیدي لېست دې مشخص او د نویو ښوونکو د چټکې ګمارنې په موخه دې راتلونکې غونډې ته معلومات وړاندې کړي.
له هراړخېزو بحثونو وروسته، غونډه د دعائيې په لوستلو سره پای ته ورسېده.
