د پوهنې وزارت د خدماتو رئیس نورستان ولایت ته ولاړ
د پوهنې وزارت د خدماتو د رئیس استاد حبیب الله خالد په مشرۍ د یاد وزارت رسمي پلاوی په یو رسمي سفر نورستان ولایت ته ورسېد.
په پیل کې پلاوي د یاد ولایت له والي او پوهنې رئیس سره وکتل او د بېلابېلو پوهنیزو مسایلو په اړه یې مفصلې خبرې وکړې.
د پوهنې وزارت پلاوي د خپل سفر اساسي موخه، د پوهنې د بودیجې د مصرف ارزونه د تدارکاتي پروژو، د ښوونکو د تدریسي ساعتونو تنظیمول، د ښوونکو د پورونو د صندوق پرانیستل، د کار او املاکو په برخه کې د بیارغونې او ساختماني پروژو وضعیت له نږدې څېړل وبلل.
له بلې خوا د نورستان پوهنې رئيس ياد پلاوي ته د ښه راغلاست پرمهال څرګنده کړه، چې دغه ناسته د پوهنې د کيفيت لاښه والي او د پوهنې په برخه کې د شته اداري او مالي ستونزو د حل په موخه جوړه شوې وه او د پلاوي د سفر د موخو د تطبيق په برخه کې د همکارۍ ډاډ ورکړ.
