په غزني ولایت کې د ۷ مېلیونه افغانیو په لګښت د یو باب ښوونځي ودانۍ پرانیستل شوه
د غزني ولایت جاغوري ولسوالۍ د زیتون کلي د معرفت اولیات لومړني ښوونځي لپاره د تدریسي ودانۍ جوړولو پروسه، چې څه موده وړاندې د ځایي خلکو په مالي مرسته د ۷ مېلیونه افغانیو په لګښت پیل شوې وه، اوسمهال په اساسي ډول بشپړه او د پوهنې چارواکو، علماءکرامو، قومي مشرانو، ښوونکو او زدهکوونکو په حضور کې ګټې اخیستنې لپاره وسپارل شوه.
د پرانیستې په مراسمو کې، د جاغوري ولسوالۍ پوهنې آمر وویل چې د ټولنې د روښانه راتلونکي لپاره تعلیمي ادارې جوړول مهم بنسټ دی او زیاته کړه چې د پوهنې د پرمختګ لپاره به یې مالي او معنوي ملاتړ دوام ومومي.
د یادونې وړ ده چې د ښوونځي دغه ودانۍ شپږ درسي ټولګي، دوه اداري خونې، یو کتابتون، د څښاک پاکو اوبو شبکه، برېښنایي سیسټم او نور اړین ملحقات لري.
