په کندهار ولایت کې د ۷مېلیونه افغانیو په لګښت د یو باب ښوونځي نوې ودانۍ پرانیستل شوه
د کندهار ولایت په نېش ولسوالۍ کې د غنيګي ښوونځي لپاره یوه بشپړه مجهزه ودانۍ، چې د پوهنې وزارت سره د یوې همکارې ادارې په مرسته د ۷ مېلیونه، ۲۷۱زره ۲۰۳ افغانیو په لګښت جوړه شوې، د ولایتي پوهنې چارواکو په حضور کې په رسمي ډول ګټې اخیستنې ته وسپارل شوه.
د ښوونځي دغه ودانۍ، چې ۶ درسي ټولګي، یوه اداري خونه، د لمریزې برېښنا سیسټم، پاکو اوبو شبکه او نورې اړینې اسانتیاوې لري، په پایله کې یې د زده کوونکو لپاره مناسب تعلیمي چاپېریال برابر شو.
د پوهنې ریاست استازو، علماءکرامو، ښوونکو، زده کوونکو او سیمه ییزو مشرانو د ودانۍ د پرانیستې په مراسمو کې ګډون وکړ.
د کندهار پوهنې ریاست چارواکو په خپلو ویناوو کې د ښوونځي له چارواکو او زده کوونکو وغوښتل چې د یاده ودانۍ او تجهیزات په اغېزمنه توګه وکاروي او د زده کړې کیفیت ته جدي پاملرنه وکړي.
