د ولایتونو پوهنې کړنو ته لنډه کتنه

هلمند

د هلمند ولایت پوهنې ریاست په دې وروستیو کې د ښوونځیو او مدارسو له سلګونو زده کوونکو څخه د «ساینس ستوري» د پېژندنې په موخه آزموینه واخیسته، چې په پایله کې د دوستي لېسې زده کوونکی صدرالدین په دې وتوانېد، د غوره نمرو په ترلاسه کولو سره د «ساینس ستوري» لقب خپل کړي.

لغمان

د لغمان ولایت د شمنګل کلي قومي مخورو د یاد ولایت له پوهنې رئیس سره په لیدنه کې د پوهنې ریاست له مشرتابه وغوښتل، تر څو د دوی د سیمې اړوند د ښوونځي ودانۍ ترمیم کړي.
د لغمان پوهنې رئیس مولوي شاه جهان ساجد قومي مخورو ته ښه راغلاست ووایه او د همکارۍ ژمنه یې وکړه.

ننګرهار
د ننګرهار ولایت روداتو ولسوالۍ اړوند د کان لېسې آمر د یادې لېسې له ۴۵ تنو یتیمو او بې وزلو زده کوونکو سره د یو- یو جوړه بوټونو مرسته وکړه او له نورو شتمنو هېوادوالو یې وغوښتل، تر څو له بې وزلو او یتیمانو زده کوونکو سره دغه ډول مرستو ته دوام ورکړي.

په یو بل خبر کې:
د ننګرهار پوهنې ریاست د ځوانانو د پټو استعدادونو د ودې او د یاد ولایت په کچه د "ساینس ستوري" د مشخصولو په موخه، د مرکز او ولسوالیو د ښوونځیو له زده کوونکو څخه آزموینه واخیسته. 
په پام ده، چې د یادې آزموینې ممتاز زده کوونکي تر پېژندلو وروسته، په ستاینلیکونو او ډالیو وویاړل شي.