د پوهنې وزارت دمالي او حسابداري ریاست او یونسیف د تخنیکي ټیم تر منځ ناسته ترسره شوه

د یکشنبې په ورځ (۱۶/۹/۱۴۴۳هـ ق-۲۸/۱/۱۴۰۱هـ ش ) د پوهنې وزارت د مالي او حسابداري ریاست د رئیس مفتي عزت الله نوري صاحب په مشري د یاد ریاست او د یونسیف د تخنيکي ټیم ترمنځ چې په ترکیب کې ښاغلی ګیلیو فرانکو(GIULIO FRANCO)، ښاغلی کریسټن الواریز(CHRISTIN ALVAREZ) او اغلې حمیرا شیرزی  شامل وو، ناسته ترسره شوه.
په یاده ناسته کې د پوهنې وزارت د مالي  او حسابداري ریاست  او یونسیف تخنیکي ټیم په لاندې مسایلو یو له بل سره هوکړې ته ورسیدل:
۱-تر راتلونکي اونۍ پوري به یونسیف د هیواد ټولو هغو ۹۴ سلنه ښوونکو ته چې د بانکي حسابونو له لارې ورته معاش ورکول کېږي، د دوو میاشتود  ۲۰۰ ډالر معاش د ورکړې پروسه  بشپړوي.
۲-د هیواد هغه ۶ سلنه ښوونکي چې بانکي حسابونه نه لري او دمعتمد له لارې ورته لاس په لاس معاش ورکول کېږي، تر راتلونکې اونۍ پورې به د پوهنې وزارت دمالي او حسابداري ریاست  د پوهنې د ولایتي ریاستونو سره په هماهنګي به هغوی ته دمعاش رسولو لپاره یو مناسب مېکانیزم جوړوي.
۳-که چیرته په راتلونکي کې یونسیف د هیواد د ښوونکومعاش  ورکوي، لازمه ده تر څو دهغو تازه ارقامو په اساس به ورکول کېږي  چې د پوهنې وزارت د مالي او حسابداري ریاست په دې آخرو میاشتو کې راټول کړیدي، ځکه چې دغه ارقام په بشپړ ډول دقیق دي، خیالي ښوونکي  ورڅخه ایستل شوي  او نوي ګمارل شوي  ښوونکي پکې شامل کړای شویدي.
۵-کله چې یونسیف دښوونکو بانکي حسابونو ته معاش حواله کوي، یا یې د معتمد له لارې ورکوي،راپور به یې وخت په وخت د پوهنې وزارت د مالي او حسابداري له ریاست سره شریکوي. 
۶-د راتلونکي لپاره چې کله یونسیف د هیواد د ښوونکو معاش ورکوي، د پوهنې وزارت له مالي او حسابداري ریاست سره په هم غږي او تفاهم به ورته یو معیاري، مناسب  او  د تطبیق وړ مېکانیزم جوړوي او دیاد میکانیزم په رڼا کې به د ښوونکو معاشونه ورکول کیږي.