غزني ولایت کې کانکور آزموینه واخیستل شوه
پوهنې وزارت، غزني : غزني ولایت کې سږنۍ کانکور آزموینه د یو لړ مراسمو په ترڅ کې د مرستیال والي محمد امین مبلغ، د پوهنې ریاست مشر تابه، د غزني پوهنتون رئيس او د ولایتي شورا یو شمیر وکیلانو په شتون کې پیل شوه.
د غزني ولایت مرستیال والي وويل: لوړې زده کړې کول د هر وکړي حق دى او د غزني ولايت سیمه ییزه اداره به اړوندو څانګو سره په همغږۍ کې هڅه وکړي، چې د دولسم ټولګيو فارغانو ته د زده کړو لا ښه فرصتونه چمتو کړي.
همدارنګه د غزني د پوهنې ریاست مالي او اداري مرستیال محمد نبي ذکي د کانکور ګډونوالو سره په جلا جلا غونډو کې د دوی ستونزې وپوښتلې او زیاته یې کړه، د کومې ستونزې په صورت کې به د پوهنې ریاست استازي د دوی ستونزو ته ځواب ووايي.
ټاکل شوې ده، چې په دې آزموینه کې به (۸۷۴۷) زده کوونکي ګډون وکړي چې څه يې د ۱۳۹۹ لمریز کال فارغان دي او يو شمير نور يې د تيرو کلونو دي.
ياده آزموينه به په دریو ورځو کې واخیستل شي.
