له ولایتونو څخه د پوهني خبرونه
لوګر
د پوهنې وزارت د احصائیې او معلوماتو ریاست په لارښوونه د لوګر ولایت د پوهنې ریاست د رسمي کارکوونکو، ښوونکو او زده کوونکو د ثبت او راجستریشن لړۍ د یو لړ مراسمو په ترڅ کې د یاد ریاست د مشرتابه په حضور کې پیل شوه
ټاکل شوې چې دا پروسه د یوې میاشتې په اوږدو کې بشپړه شي او په دې سره به د لوګر د پوهنې ریاست ټول کارکوونکي د دې ریاست د احصایې مدیریت په ډیټابیس کې ثبت شي چې د پوهني وزارت آنلاین ډیټابیس به هم ورته لاسرسی ولري.
بغلان
د بغلان ولايت د پوهنې رئيس الحاج مولوي محمد نور عزيزي په یاد ولايت کې د مرستندویو بنسټونو له استازو سره وکتل.
په دې کتنه کې د بغلان د پوهنې رئيس د مرستندویو بنسټونو له استازو سره د پوهنې د پرمختګونو، د مرستندویو بنسټونو د فعاليتونو، د سيمه ييزو ښوونيزو ټولګيو په اغېزو او د نورو اړینو موضوعاتو په باب خبرې وکړې.
کابل
د کابل ولایت د پوهنې رئیس مولوي عبدالحق حقاني د کابل ولایت د بګرامیو په ولسوالۍ کې د حسین خېل او عبدالشکور رشاد لېسو له ښوونیزو او اداري فعالیتونو څخه څارنه وکړه.
کاپیسا
د کاپیسا ولایت د پوهنې رئیس مولوي محمد فرید حقاني د یاد ولایت تګاب ولسوالۍ ته د یوه کاري سفر په ترڅ کې د شهید محمد امان او الحاج شهزاده لېسې له ښوونیزو او اداري چارو څخه څارنه وکړه.
لغمان
د پوهنې وزارت په همغږۍ د آسيا نړيوالې مؤسسې په مرسته په لغمان ولایت کې د سيمه ييزو زده کړو له ټولګيو څخه ۴۰ تنه زده کوونکي له درې کلنې ښوونیزې دورې څخه فارغ او له یوې ځانګړې ازموينې څخه وروسته د مهترلام ښار د سلطان غازي بابا ښوونځي ته معرفي شول.
