په غور ولایت کې د ښوونیزو بنسټونو مسئولینو لپاره د وړتیا لوړونې ښوونیز سیمینار پیل شو
د غور ولایت د مرکز او ولسوالیو د پوهنیزو بنسټونو د ۸۶۶ تنو مسئولینو، د کیفیت تضمین آمریت کارکوونکو، مدیرانو او غړو لپاره د ارقامو او احصائیوي معلوماتو د راټولولو په برخه کې د وړتیا لوړونې روزنیز سیمینار جوړ شو.
یاد سیمینار د پوهنې وزارت د احصائيې رياست لخوا د دغه رياست د رئيس مولوي بسم الله نعماني په مشرۍ او د ياد ولايت پوهنې رئيس مولوي حفيظ الله محفوظ په ګډون پيل شو.
په پیل کې د غور ولایت پوهنې رئیس د پوهنې وزارت د احصائیې ریاست پلاوي ته د ښه راغلاست ترڅنګ، د کارکوونکو مسلکي کولو او د هغوی د وړتیا لوړولو په برخه کې د سیمینارونو پر اهمیت خبرې وکړې او له ګډون والو یې وغوښتل، چې له خپلو زده کړو مهارتونو څخه په ورځنیو رسمي چارو کې د مطلوبو احصائیو راټولولو لپاره اعظمي ګټه پورته کړي.
په ورته مهال د پوهنې وزارت د احصائيې رئيس مولوي بسم الله نعماني هم غور ولايت ته د خپل رسمي سفر په اړه خبرې وکړې او ويې ويل، چې د دغه سیمینار له پیلولو څخه یې اساسي موخه، د پوهنې بنسټونو د مسئولینو د وړتياوو لوړول دي.
نوموړي زیاته کړه، دغه پروګرام په یو وخت د غور ولایت په ټولو ولسوالیو کې په لاره اچول شوی او درې ورځې به دوام وکړي.
