په لوګر کې د نجونو یو ښوونځي ته ودانۍ جوړه شوه
د پوهنې وزارت، لوګر: د لوګر په خوښۍ ولسوالۍ کې د خواجه لغوي په نوم د نجونو د منځني ښوونځي ودانۍ تر جوړېدو وروسته ګټې اخیستنې ته وسپارل شوه.
د یاد ښوونځي ودانۍ په یوه پوړه کې د کلیو بیارغونې او پراختیا وزارت اړوند د اقراء پروګرام له لارې جوړ شوی دی.
جوړه شوې ودانۍ ۱۰ درسي ټولګي، دوه اداري خونې، د لمریزې برېښنا سیستم، د اوبو واټر پمپ او ۳ غرفې تشنابونه لري.
دغه ښوونځۍ ۱۲ کاله مخکې تاسیس شوی، اوس مهال له لومړي ټولګي څخه تر نهم ټولګي پورې ۵۳۳ زده کوونکې لري، چې د نوې ودانۍ په جوړېدو سره ۵۰۰ زده کوونکو ته د زده کړو لازم ښوونیز چاپیریال برابر شو.
د لوګر د پوهنې رئیس سرمؤلف سید عزیز احمد هاشمي د یاد ښوونځي پر جوړېدو خوښي څرګندوي او زیاتوي، چې په خوښۍ ولسوالۍ کې د نجونو او هلکانو ۲۲ ښوونځي شته، چې یواځې د حضرت بلال(رض) په نوم یو ښوونځی ودانۍ نه لري.
د یادونې وړده، چې په لوګر کې له دې مخکې هم د اقراء پروګرام له لارې د ۱۱ نورو ښوونځیو ودانۍ او اړین ملحقات ګټې اخیستنې ته سپارل شوې دي.
