په کابل ښار کې د ښوونځیو د زده کوونکو ترمنځ د اسلامي زده کړو سیالي ترسره شوه
د ښوونې او روزنې معینیت تر چتر لاندې د زده کوونکو د چارو ریاست له لورې د افغان بسیم مخابراتي شرکت په مالي مرسته د کابل ښار د ٣٢٠ زده کوونکو ترمنځ د اسلامي زده کړو سیالۍ په لاره واچول شوه.
دغه سیالۍ نن د یو لړ مراسمو په ترڅ کې د پوهنې وزارت د مرستیالانو، مرکزي څانګو رئیسانو، افغان بېسیم شرکت د استازو، علماوو، استادانو او د کابل ښار د ښوونځیو د زده کوونکو په ګډون د مرکز ساینس د کنفرانسونو په تالار کې رسما پرانیستل شوې.
په پیل کې د زده کوونکو چارو رئیس، أستاد حبیب الله خالد، مېلمنو ته د ښه راغلاست په ترڅ کې وویل: په دې سیالیو کې د کابل ښار له هرې تعلیمي حوزې څخه ۲۰ تنو ممتازو زده کوونکو برخه اخیستې ده، چې پوښتنې یې د اسلامي زده کړو په برخه کې د ښوونځي له نصاب څخه چمتو شوې دي.
د پوهنې وزارت د کیفیت د تضمین معین، الحاج مولوي عبدالخالق صادق، د افغان بېسیم شرکت له مرستو څخه د مننې ترڅنګ له نورو ملي سوداګرو هم وغوښتل تر څو د دا ډول علمي پروګرامونو په پلې کول کې برخه واخلي، له مادي او معنوي پلوه یې ملاتړ وکړي.
د افغان بېسیم شرکت رئیس، محمد سلیمان خرمي هم په خپلو خبرو کې د وزارت له پلانونو څخه د ملاتړ په برخه کې د یاد شرکت پر چمتووالي ټینګار وکړ.
له بل لورې زده کوونکو هم د دغه ډول سياليو ترسره کول د خپلو استعدادونو او پوهې په وده کې ګټور وبلل، د دوام غوښتنه يې وکړه.
د يادونې وړ ده چې د زده کوونکو د رقابتي ازموينې د روڼتيا په موخه کې د پوښتنو د صندوق مهرلاک د پوهنې وزارت د مشرتابه پلاوي پرانیستل او پر زده کوونکو يې پوښتنې ووېشلې.
