د پوهنې سرپرست وزیرې د افغانستان لپاره د سویډن کمیټې له رییس سره ولیدل
پوهنې وزارت_کابل: د پوهنې وزارت سرپرستې آغلې رنګینې حمیدي د افغا نستان لپاره د سویډن کمیټې له رییس ښاغلي دانیال مدهاني سره په خپل کاري دفتر کې ولیدل.
آغلې حمیدي د سویډن کمیټې له همکارۍ څخه چې پوهنې وزارت سره یې لري مننه وکړه زیاته یې کړه: ښوونې او روزنې ته د افغان بچیانو لاسرسی د پوهنې وزارت له موخو او لومړیتوبونو څخه شمیرل کیږي چې په دې لاره کې مشخص لید لوري، جامع برنامې او کلک هوډ شتون لري چې پرته له شکه د سویډن کمیټې همکاري زموږ سره په دغه سپیڅلې لاره کې ډیره اغیزمنه ثابتیږي.
ښاغلي مدهاني د پوهنې د بهیر څخه د خپل ملاتړ ترڅنګ زیاته کړه: د سویډن کمیټه به د ښوونکو د وړتیا د لوړلو، د محلي زده کړو د خدماتو په وړاندې کولو او همدا رنګه د پوهنې وزارت په نورو برخو کې به پر خپلو ژمنو په کلک هوډ سره ولاړه وي.
