په فراه کې د کتاب لوستلو او د مطالعې فرهنګ د عامولو په موخه سيالۍ تر سره شوه
د پوهنې وزارت، فراه: د فراه ولایت د پوهنې ریاست او ښځو چارو ریاست په ګډه همکارۍ د مطالعې فرهنګ د عامولو په موخه د نجونو اته ښوونځيو زده کوونکو تر منځ سیالي تر سره شوه. یاده سیالي چې د ښځو چارو ریاست د غونډو په تالار کې په لاره اچول شوې وه، د پوهنې ريس وحيدالله شيراني، ښځو چارو ريسې کبرا اعظمي، اطلاعاتو او کلتور، کرنې او د کليو پراختيا رئیسانو ګډون درلود.
په یاده غونډه کې د پوهنې ریيس شېراني د کتاب او مطالعې اړوند د مفصلو مالوماتو تر څنګ زده کوونکي د کتاب سره د مينې او علاقې درلودو ته وهڅول او له زده کوونکو څخه يې وغوښتل که غواړئ چې د ژوند لوړو پوړو ته ورسېږئ کتاب مو دژوند ملګری وټاکئ.
سیالي د ټاکل شوي هیأت تر څارنې لاندې د الف او ب ګروپونو تر نامه لاندې د سوال او ځواب په شکل پيل شوه. غونډه د پوهنې ريس لخوا د ګټونکي ټيم ته د ډاليو په ويشلو سره پایته ورسیده.
