په میدان وردګ ولایت کې د ښوونیزو بنسټونو مسئولینو لپاره د وړتیا لوړونې سیمینار پرانیستل شو
د میدان وردګ ولایت د مرکز او ولسوالیو د ښوونیزو بنسټونو ۵۰۰ تنو مسئولینو لپاره د ارقامو او احصائیوي معلوماتو راټولولو په برخه کې د هغوی د مسلکي وړتیاوو لوړولو په موخه، روزنیز سیمینار رسما پیل شو.
ياد پروګرام د پوهنې وزارت د احصائيې رياست له خوا د دغه رياست د رئیس مولوي بسم الله نعماني په مشرۍ او د میدان وردګ ولايت پوهنې رئيس مولوي محمد عثمان حريت په ګډون پرانیستل شو.
په پیل کې د یاد ولایت پوهنې رئیس د پوهنې وزارت د احصائیې ریاست پلاوي ته د ښه راغلاست ترڅنګ، د کارکوونکو د مسلکي کولو او د هغوی وړتیاوو لوړولو په برخه کې د سیمینارونو پر اهمیت او مؤثریت تفصیلي خبرې وکړې.
په ورته مهال د پوهنې وزارت د احصائیې رئیس مولوي بسم الله نعماني، میدان وردګ ولایت ته د دغه پلاوي د سفر د موخې په اړه خبرې وکړې او ویې ویل: د یاد مسلکي سیمینار اساسي موخه، د همدغه ولایت د ښوونیزو بنسټونو اړوندو کارکوونکو د وړتیاوو لوړول دي.
نوموړي زیاته کړه، دغه پروګرام په یو وخت د میدان وردګ ولایت په ټولو ولسوالیو کې په لاره اچول شوی دی.
