په امريكا كې ميشت افغانانو له پوهنې وزير سره په ليدنه كې د افغانستان د ښوونځيو په بيا رغونه او د دې هيواد د بيوزله ماشومانو سره د مرستو او همكاريو ژمنه وكړه
د پوهنې وزارت _ واشنګټن: د پوهنې وزير امريكا ته په خپل سفر كې په ياد هيواد كې له مېشتو افغانانو سره وليدل.
دغه ليدنه چې په امريكا كې د افغانستان په سفارت كې ترسره شوه، ډاكټر بلخي په افغانستان كې پوهنه د خلكو لپاره او د يوې غير سياسي ټولنې په توګه ياده كړه او په بهر كې يې له مېشتو افغانانو وغوښتل ترڅو په هيواد كې د ښوونځيو د جوړلو، بيارغولو، د ماشومانو له ښوونې او روزنې څخه د ملاتړ، سواد زده كړې او په ټوليز ډول د پوهنې د پرمختګ په برخه كې مرستې وكړي.
د پوهنې رهبرۍ په هيواد كې ۳،۷ ميليونه زده كوونكو په خاص ډول هغه نجونو ته چې ښوونځيو ته لاسرسى نلري خاصه پاملرنه كړې او په ښوونځيو كې د يادو زده كوونكو د شاملېدو په برخه كې يې د دې وزارت د هڅو يادونه وكړه.
په امريكا كې ميشت افغانانو د پوهنې وزارت هڅې وستايلې او د افغانستان له پوهنې وزارت سره يې د لازياتو مرستو ژمنه وكړه.
په امريكا كې ميشت افغانانو په څو برخو لكه: د ښوونكو د ظرفيت لوړونه د آنلاين كورسونو په وسيله، د ښوونځيو په بيا رغونه كې ونډه اخيستل، په ښوونځيو كې د بدني روزنې پياوړتيا او له ښوونځيو څخه د بهر ماشومانو څخه ملاتړ له پوهنې وزارت سره په ګډه د مرستو او همكاريو ژمنه وكړه.
د يادونې وړ ده چې د هيواد د پوهنې سرپرست وزير ډاكټر محمد ميرويس بلخي ( د تعليم په تمه نه پاتې كيږي )ECW ټولنې په مركزي سمينار كې د ګډون، د نړۍ د پيژندل شويو او اكاډميكو څېرو سره د ليدو او په افغانستان كې د ښوونې او روزنې لپاره د مرستو د جلبولو په موخه د روان كال د وري د مياشتې په ۲۲ نېټه د امريكا متحده ايالاتو ته سفر كړى.
