د ولایتونو له پوهنې ریاستونو د خبرونو لنډیز
ميدان وردګ
د میدان وردګو ولایت پوهنې رئیس مولوي محمد عثمان حریت د ياد رياست له آمرانو او مامورینو سره د ناستې په ترڅ کې د ښځینه زده کوونکو تدریس لپاره د لازمو اسانتیاؤ برابرول، د مرستندویه بنسټونو له فعالیتونو څخه د دوامداره څارنې، د پوهنیزو او مالي چارو بهیر، د ولسوالیو په تعلیمي مرکزونو کې ديني او اداري اصولو سره سم د کارکوونکو له دندو څخه څارنه او د استهلاک شوو توکو ترميم او راټولولو په اړه هر اړخیز تفصيلي بحثونه وشول.
بلخ
د بلخ ولایت د پوهنې رئیس الحاج مولوي عبدالجلیل شهید خېل د خصوصي ښوونځیو له مسؤلینو سره په کتنه کې د يادو ښوونځیو اداري او تدریسي چارو د ښه والي په اړه خبرې وکړې.
له بلې خوا د خصوصي ښوونځيو استازو خپلې ستونزې او وړانديزونه د پوهنې رياست مشرتابه ته وړاندې کړل او د حل غوښتنه يې وکړه.
پروان
د سواد زده کړې مرستندویه بنسټ یو شمېر ښوونکو ته روزنیز سیمینار جوړ کړ او هغوی ته یې د تدریس نوي میتودونه ور زده کړل.
د پروان ولايت د پوهنې رئيس مفتي محمد حسن حقاني د دغه سيمينار د جوړېدو له امله له يادې مؤسسې مننه وکړه او له ګډونوالو يې وغوښتل، چې خپل معلومات له نورو ښوونکو سره هم شريک کړي.
لوګر
د لوګر ولایت د پوهنې رئیس مولوي جنت ګل عزیز ازرې ولسوالۍ ته ولاړ او هلته یې د ښوونځیو له ښوونیزو چارو ليدنه وکړه.
نوموړي له مسؤلينو، ښوونکو، زده کوونکو او قومي مشرانو سره د ليدنې په ترڅ کې د پوهنيز نظام د ښېرازۍ او پرمختګ په برخه کې د هر ډول مرستې او همکارۍ ژمنه وکړه.
کابل
د کابل ولايت زرغونې لېسې ښوونکو په خپل شخصي لګښت او د ښوونځيو د شوراګانو په ملاتړ د يادې لېسې انګړ جغل کاري کړ.
د يادولايت پوهنې ریاست له ښوونکو د دغه اقدام هرکلی کړی او له نورو مرستندويه بنسټونو يې غوښتي چې د پوهنې په برخه کې ورته فعالیتونه پلي کړي.
