له ولایتونو څخه د پوهنې فعالیتونو خبري ټولګه
غزني
د غزني ولایت پوهنې رئیس، الحاج مولوي میر نصیر احمد حسیني، د پوهنې وضعیت ارزونې او د عمریه مدرسې زده کوونکو ته د درسي موادو د وېش دڅارنې په موخه د دې ولايت ده یک ولسوالۍ ته سفر وکړ.
نوموړي د پوهنې له مسؤلینو سره د لیدنې او د ښوونیزو فعالیتونو د ښه والي په اړه د خبرو ترڅنګ، د دې ولسوالۍ له یو شمېر قومي مشرانو سره هم وکتل.
جوزجان
د جوزجان ولايت د پوهنې رئيس، الحاج مولوي محمد طاهر جواد، د ديني مدارسو له علماوو او مسئولينو سره د يوې غونډې په ترڅ کې د پوهنې وزارت د کړنلارو تطبيق او د تشکيلاتو د وېش په اړه تفصيلي خبرې وکړې.
د مدارسو مسئولینو د پوهنې رئیس ته ډاډ ورکړ، چې د پوهنې له کړنلارې سره سم به عمل کوي.
هرات
د هرات ولايت د پوهنې رئيس، مولوي عبدالله اميني، د یاد ولايت د دارالعلومونو، مدارسو او دارالحفاظونو له مسئولينو سره په کتنه کې پر لازمو مسايلو لکه: د تعليمي پروګرامونو ښه والي، کړنلاروتحليل، اسلامي تعليماتو د تشکيل بيا کتنه او د افغانستان ا.ا رهبرۍ د حکمونو پلي کولو په اړه تفصيلي خبرې وکړې.
د پوهنې رئيس څرګنده کړه چې مدارسو او ديني بنسټونو ته پاملرنه د پوهنې ادارې له کاري لومړيتوبونو څخه ده.
لوګر
دلوګر ولايت د پوهنې رئيس وايي: یاد ولايت د سړو سيمو دښوونځيو څلور نيم مياشتنۍ آزموينې په برياليتوب سره پاى ته ورسېدې او د پوهنې وزارت له کړنلارې سره سم دزده کوونکو درسونه يوځل بيا پيل او په عادي ډول روان دي.
سرپل
د هېواد سړو سیمو کې د څلور نیم میاشتنيو آزموینو له پای ته رسېدو سره سم په پام کې ده، چې د سرپل ولایت د دولسمو ټولګیو فارغانو څخه د کانکور آزموینه واخیستل شي.
د ياد ولايت پوهنې رياست وايي: د آزموينې اخيستلو په برخه کې بشپړ چمتووالى نيول شوى دى.
