لوګر کې یوه نوې دیني مدرسه پرانیستل شوه
د لوګر مرکز پل علم پورې اړوند د سید حسین کمیدان په سیمه کې د دارالقرآن بي بي زینب په نوم یوه نوې دیني مدرسه فعاله شوه .
د یادې مدرسې په پرانیست غونډه کې د پوهنې رئیس عبدالوکیل کلیوال، یو شمېر دیني عالمانو، قومي مشرانو او زده کوونکو برخه اخیستې وه.
دغه مدرسه د سیمې خلکو په غوښتنه د پوهنې وزارت د اسلامي زده کړو معینیت تر منظورولو وروسته تاسیس شوه.
په یاده مدرسه کې د بیلا بیلو سیمو ۲۰۰ نجونۍ او هلکان په دیني زده کړو بوخت دي.
د نوموړې مدرسې د ودانۍ جوړېدو لپاره د یاد کلي یوه اوسیدونکي سید نجیب الله ۶ بسوې ځمکه هم معارف ته وقف کړې ده.
د لوګر د پوهنې رئیس عبدالوکیل کلیوال د یادې سیمې اوسېدونکو ته د مدرسې د پرانیستو مبارکي ورکړه او ترې ویې غوښتل، چې خپل اولادونه د دیني زده کړو لپاره دغې مدرسې ته ولېږي.
د پوهنې رئیس ژمنه وکړه، چې په لوګر کې به د دیني مدرسو، دارالحفاظونو او دارالعلومونو شمېر زیاتوي او هم به ودانۍ ورته جوړ کړي.
په لوګر کې دا مهال ۲۹ دیني مدرسې، دارالحفاظونه او دارالعلومونه فعالیت لري، چې د ۹۰۵ نجونو په ګډون ۳۰۳۰ کسان په کې دیني زده کړې کوي.
