د کابل ولایت پغمان ولسوالۍ د زده کوونکو ترمنځ د سپورټي سیالیو خزاني پړاو پیل شو
د پوهنې وزارت د اساسي او ثانوي زده کړو ریاست د بدني روزنې مسئولینو، د پغمان ولسوالۍ پوهنې چارواکو، د ښوونځیو ښوونکو او زده کوونکو په حضور کې د سپورټي لوبډلو ترمنځ خزاني سیالۍ پیل شوې.
د یادو سیالۍ تر پرانیستلو وروسته، د والیبال ټورنمنټ لومړی پړاو د پغمان او نظیف عمر لېسو د لوبډلو ترمنځ پیل شو، چې په پایله کې د پغمان لیسې لوبډلې وکولای شول، مخالفې لوبډلې ته د صفر په وړاندې دوه نمرو سره ماتې ورکړي.
د ټورنمنټ په دویم پړاو کې، چې د یادې ولسوالۍ د دوده مست او خواجه لکن لېسو د لوبډلو ترمنځ ترسره شو، لوبه د دوده مست لېسې د زده کوونکو په ګټه ۲-۰ پای ته ورسېده.
د یادونې وړ ده چې دغه سیالي به هره ورځ دوام وکړي او په پای کې به ګټونکو ته سپورټي جایزې ورکړل شي.
