د کابل ولایت پوهنې ریاست کې «د ساینس ستوري» سیالیو غوره زدهکوونکي وستایل شول
د کابل ولایت پوهنې ریاست له لوري، په یوه پرتمینه غونډه کې «د ساینس ستوري» سیالیو غوره زدهکوونکي د ډالیو په ورکولو وویاړل شول.
په یاده غونډه کې، د پوهنې وزارت مالي او اداري معین محترم الحاج مولوي صبغتالله وصیل، د کابل ولایت پوهنې رئیس محترم الحاج مولوي عبدالسلام شعیب، ګڼ شمېر مسئولینو، د زدهکوونکو کورنیو او نورو مېلمنو ګډون درلود.
ویناوالو د اسلامي علومو ترڅنګ د ساینسي علومو پر اهمیت هم ټینګار وکړ او زدهکوونکي یې وهڅول چې د دیني علومو ترڅنګ په ساینسي علومو کې هم جدي کوښښ وکړي.
د مراسمو په پای کې، د مسئولینو له لوري غوره زدهکوونکي په ډالیو او ستاینلیکونو وستایل شول، چې د لومړي تر درېیم مقام پورې «ساینس ستوري» ترلاسه کوونکو ته لپټاپونه، د څلورم او پنځم مقام ترلاسه کوونکو ته آیپډونه او نورو ګډونوالو ته بېلابېلې ډالۍ ورکړل شوې.
