د ولایتونو له پوهنې څو لنډ خبرونه
غزني
د پوهنې وزارت د ودانیو او ملکیتونو د ساتنې او مراقبت رئیس محترم مولوي سمېع الحق حماس، چې د یاد وزارت د پروژو د څارنې او بیاکتنې لپاره یې مختلفو ولایتونو ته سفر کړی، اوسمهال غزني ولایت ته رسېدلی او هلته یې د پوهنې له رئیس محترم الحاج مولوي نصیر احمد حسیني سره په کتنه کې، د پوهنیزو پروژو د پرمختګ په اړه خبرې وکړې.
د غزني ولایت پوهنې چارواکو په وینا، د پروژو کارونه د یاد ولایت په ۱۱ ولسوالیو کې بشپړ شوي دي.
کونړ
د کونړ ولایت ناړۍ ولسوالۍ د دیني مدرسې د لیلیې بیارغونې کار، چې لګښت یې ۶۸۱ زره افغانۍ اټکل شوی، ۹۰ سلنه پرمخ تللی او په بشپړېدو سره به یې طلابو ته نورې اسانتیاوې هم برابرې شي.
د یو بل خبر له مخې
د کونړ ولایت په مرکز او ولسوالیو کې د ښوونکو مسلکي پراختیا ۱۱۶ تنو علمي غړو لپاره ۹ ورځنی مسلکي روزنیز سیمینار پیل شو.
فاریاب او بامیان
د ملک په سړو ولایتونو کې د ژمنیو رخصتیو په رارسېدو سره، په فاریاب او بامیان ولایتونو کې د درېیم ټولګي زدهکوونکو سواد کچې لوړولو په موخه، کورسونه جوړ او فعال شوي دي.
